ليه محسس نفسك؟

ليه محسس نفسك ومحسسنا ان مفيش حد عنده مشاكل غيرك ؟؟؟

...وان الهموم سابت الناس كلها وجت عندك :

طيب يا سيدي خلاص متزعلش انا مصدقاك والله

عندك مشاكل كتير وهموم اكتر وحاسس انها ضاقت عليك من كل ناحيه

بس انا لومنك المفروض افرح مش ازعل

استني بس متزعلش انا مش بتريق والله ..انا بتكلم جد

ايوه جد متستغربش اوي كده :d

طيب الاول صل معايا عالحبيب المصطفي وانا هقولك المفروض تفرح ليه

اللهم صل وسلم وبارك عليك يا حبيبي يارسول الله

اسمع معايا بقي الحديث ده بيقول ايه

قال رسول الله صلّ الله عليه و سلم:

(ما يصيب المسلم، من نصب ولا وصب، ولا هم ولا حَزَن ولا أذى ولا غم، حتى

الشوكة يُشاكها، إلا كفَّر الله بها من خطاياه)

الراوي: أبو هريرة المحدث: البخاري - المصدر: صحيح البخاري - الصفحة أو الرقم: 5641خلاصة حكم المحدث: [صحيح

شفت بقي ان عندي حق

بالله عليك بقي المفروض تفرح ولا لاء؟؟؟؟

يعني الهم والمشاكل اللي حضرتك قاعد وحاططهم فوق راسك دوول سبب ان ربنا سبحانه وتعالي بيخفف وبيشيل من ذنوبك

شفت بقي ربي وربك اد ايه كريم ورحيم بينا

سبحانه وتعالي حتي تعبنا او مرضنا او همومنا بيجعلها سبب في قربنا من الجنه ان شاء الله

وكمان انا قلتلك قبل كده ان ربنا سبحانه وتعالي مش بيبتلي غير عبده اللي بيحبه علشان بيبقي عاوز يسمع صوته وهو بيدعيه ويقول يـــارب

يعني ربك حبيبك عاوزك قريب منه وعاوزك تفتكره كتيـــر في همك وحزنك وكمــان في فرحك


خلاص بقي هتبطل تفكير وهتشيل التكشيره اللي علي وشك ديه وهتقول اللهم لك الحمد والشكر


ايوه اخواني واخواني عاوزين علي طول نشكر ربنا ونحمده علي فضله ونعمه اللي هي اكتر بكتير من مشاكلنا وهمومنا


يلا بينا بقي نقوووووم نتوضا كالعاده ونستعد لصلاه القيام

اللي هي اقرب طريق بيوصلنا لرب العالمين من غير اي حواجز

وبنكون فيها محتاجين ندعي كتير ونستغفر ونتوب من كل ذنب او معصيه عملناهم


ونقوله ياااارب يا كريم يا عفو يا غفور ارحمنا واهدينا لما تحب وترضي

تقبل الله من ومنكم صالح الاعمال